គ្រួសាររីករាយ Happy Family

Wednesday, September 27, 2017

របៀបធ្វើប្រហិតសាច់ជ្រូក

គ្រឿងផ្សំ៖
    - សាច់ជ្រូកចិញ្ច្រាំ ២០០ ក្រាម
    - សាច់ជ្រូកកិនម៉ដ្ឋ ២០០ ក្រាម
    - អំបិល ១/៤ ស្លាបព្រាកាហ្វេ អាចថែមថយតាមចំណូលចិត្ត
    - ម្រេចម៉ដ្ឋ តាមចំណូលចិត្ត
    - ម្រេចគ្រាប់ តាមចំណូលចិត្ត
    - អាចដាក់ម្សៅស៊ុប ឬមិនដាក់ក៏បាន

    វិធីធ្វើ៖
    - សាច់ជ្រូកចិញ្ច្រាំ, សាច់ជ្រូកកិនម៉ដ្ឋ ដាក់ក្នុងទូទឹកកក រយៈពេល៣០នាទី (ឱ្យសាច់កកបន្តិចសិន)
    - រួចហើយដាក់អំបិល និងម្រេចចូលសាច់
    - ដាក់សាច់ចូលក្នុងម៉ាសិនកិនសាច់ ឱ្យសាច់ឡើងរមួត រួចធ្វើឱ្យវាចេញជារាងមូលបង់ចូលទឹកកំពុងដាំឱ្យឆ្អិនជាការស្រេច៕

Tuesday, September 26, 2017

របៀបធ្វើត្រីបឹងកញ្ឆែត

គ្រឿងផ្សំ៖

- ត្រីរ៉ស់ ២ លាងសម្អាតឱ្យស្អាត
- គ្រឿងបុក (គល់ស្លឹកគ្រៃ រមៀត ស្លឹកក្រូចសើច រំដេង ខ្ទឹមស)
- កាពិ
- ម្ទេសក្រៀម ចិញ្ច្រាំឱ្យម៉ត់
- ខ្ទិះដូង
- ខ្ទឹមក្រហម ហាន់ជាបន្ទះស្ដើងៗ
- ខ្ទឹមស ចិញ្ច្រាំឱ្យម៉ត់
- ទឹកប្រេងខ្ចង ម្សៅស៊ុប ស្ករស អំបិល
- ទឹកអំពិលទុំ
- សណ្ដែកដីបុក
- កញ្ឆែត

វិធីធ្វើ៖

- យកត្រីរ៉ស់ មកបំពងឱ្យឆ្អិន ក្រៀម រួចដួសទុកមួយអន្លើ។
- កញ្ឆែតយកមកលាងឱ្យស្អាត រួចយកមករៀបដាក់ឆ្នាំងដែលត្រូវទទួលទាន និងយកត្រីដែលបានបំពងឆ្អិនហើយ មកដាក់ពីលើកញ្ឆែត រួចយកទុកមួយអន្លើទៀត។
- យកត្រីរ៉ស់មួយក្បាលទៀត មកស្ងោរឱ្យឆ្អិន រួចបេះយកតែសាច់ត្រី ហើយបុកឱ្យរៀងម៉ត់បន្តិច (ទឹកដែលស្ងោរត្រីត្រូវទុក)។
- ដាក់ប្រេងឆាចូលក្នុងខ្ទះទុកឱ្យក្ដៅ រួចដាក់គ្រឿងបុក ម្ទេសក្រៀម កាពិ ខ្ទឹមក្រហម ខ្ទឹមស សណ្ដែកដី កូរឱ្យឡើងក្រហម ឈ្ងុយ។
- បន្ទាប់មកដាក់ សាច់ត្រី ទឹកប្រេងខ្ចង ម្សៅស៊ុប ស្ករស អំបិល និង ទឹកស្ងោរត្រីចូល កូរចូលគ្នាឱ្យសព្វ រួចដាក់ទឹកអំពិលទុំ និង ខ្ទិះដូងចូល។
- ទុកឱ្យពុះ រួចភ្លក្សមើលឱ្យល្មមតាមការនិយមចូលចិត្ត (ធ្វើឱ្យនៅខាប់ល្មម) ទើបយកមកស្រោចពីលើត្រី និង កញ្ឆែតដែលយើងបានរៀបទុកឱ្យសព្វ រួចជាការស្រេច៕

របៀបធ្វើការ៉េមរស់ជាតិល្ពៅ

គ្រឿងផ្សំ៖

- ល្ពៅ ២០០ក្រាម
- ទឹកដោះគោជូរមានជាតិស្ករ ២០០ក្រាម
- ទឹកដោះគោខាប់ ៣០ ទៅ ៤០ មីលីលីត្រ

ជំហានទី ១៖

- ល្ពៅកាត់ជាដំតូចៗ ស្ងោឆ្អិន ទុកឱ្យត្រជាក់

ជំហានទី ២៖

- ល្ពៅត្រជាក់ហើយយកដាក់ក្នុងទូទឹកកករហូតដល់កក

ជំហានទី ៣៖

- យកល្ពៅកក និងទឹកយ៉ាអួរទៅកិនឱ្យម៉ត់
- នៅពេលដែលល្ពៅម៉ត់បន្ថែមទឹកដោះគោខាប់ យើងកិនប្រហែល ២-៣ នាទីទៀត។

ជំហានទី ៤៖

- ដាក់ក្រែមចូលទៅក្នុងប្រអប់បិទជិតរួចដាក់ចូលក្នុងទូទឹកកក ២ ម៉ោងញុំាបានហើយ៕

របៀបធ្វើបាយឆាបែបចិន

+ គ្រឿងផ្សំ៖

- បាយ ១ចានគោមធំ
- ស៊ុត ១គ្រាប់គោះដាក់ចានវាយឱ្យបែក
- សាច់ជ្រូក កន្លះខាំស្ងោរឆ្អិនហាន់តូចៗល្មម
- សាច់ក្រក់ ២ដុំចៀនឆ្អិនហាន់ស្តើងៗ
- ការ៉ុត ១មើមតូចហាន់តូចៗ
- សណ្តែកបារាំង ៣-៤គួរហាន់តូចៗ
- ស្លឹកខ្ទឹម ២ដើមហាន់
- ខ្ទឹមសចិញ្ច្រាំ កន្លះស្លាបព្រាបាយ
- ប្រេងឆា ១-២ស្លាបព្រាបាយ
- ម្រេចម៉ត់ ដាក់តាមការចូលចិត្ត
- ទឹកស៊ីអ៊ីវ កន្លះស្លាបព្រាបាយ
- អំបិល ចុងស្លាបព្រាបាយ
- ម្សៅស៊ុបមាន់ កន្លះស្លាបព្រាកាហ្វេ
- ស្ករស ចុងស្លាបព្រាកាហ្វេ

+ វិធីធ្វើ៖
១. ដំបូងយកការ៉ុត និងសណ្តែកបារាំងដាក់ស្រុះប្រហែលជា ៣-៤នាទី។
២. យកប្រេងឆាដាក់ចូលក្នុងខ្ទះ ដាក់ភ្លើងឱ្យក្តៅដាក់ខ្ទឹមសចូលឆាឱ្យមានខ្លិនឈ្ងុយចាក់ស៊ុតចូលឆាឱ្យឆ្អិនដាក់បាយចូល។
៣. បន្ទាប់មកឆាបញ្ចូលគ្នាឱ្យសព្វដាក់ សាច់ជ្រូក, សាច់ក្រក, ការ៉ុត និងសណ្តែកបារាំងឆាបញ្ចូលគ្នាមួយសារសិន។
៤. ដាក់គ្រឿងចូល ម្រេច, ទឹកស៊ីអ៊ីវ, អំបិល, ម្សៅស៊ុបមាន់ និងស្ករសឆាបញ្ចូលគ្នាឱ្យសព្វ ដាក់ស្លឹកខ្ទឹមចូលឆាមួយទៅពីរត្រឡប់ទៀតជាការស្រេច៕

របៀបធ្វើប្រហិតសាច់គោ

គ្រឿងផ្សំ៖

- សាច់គោ ៣៥០ក្រាម អាចប្រើសាច់គោកិនស្រាប់
- ម្សៅពោត ២ស្លាបព្រាបាយ
- ទឹកត្រី ២ស្លាបព្រាបាយ
- ម្សៅស៊ុប ១ ស្លាបព្រាកាហ្វេកន្លះ
- អំបិល ១ស្លាបព្រាកាហ្វេកន្លះ
- baking powder ១ស្លាបព្រាកាហ្វេកន្លះ (ម្សៅដុតនំ)
- ម្រេច

វិធីធ្វើ៖
១. សាច់ និងគ្រឿងទាំងអស់ដាក់ចូលទៅក្នុងម៉ាស៊ីនកិនសាច់ រហូតដល់សាច់ស្វិតល្អ។
២. យកសាច់ចេញ រួចដាក់ចូលថង់ប្លាស្ទិច ។ កាត់ក្បាលថង់តូចល្មមដើម្បីច្របាច់ប្រហិតចេញមកមូលល្អ ហើយជាវិធីដែលងាយស្រួល។
៣. ក្នុងអំឡុងពេលច្របាច់ប្រហិត ដាក់ទឹកដាំឱ្យពុះដាក់អំបិល, ស្ករ រួចភ្លក់មើលថាបើរសជាតិល្មម គឺបានហើយ។ (វិធីនេះមិនធ្វើឱ្យសាច់គោសាបពេលស្រុះរួច) ។ ទឹកពុះដាក់សាច់គោចូលចម្អិន ៥នាទី រួចដួលចេញ។
៤. ប្រសិនបើធ្វើទុកញុំាពេលដួលចេញដាក់ចូលទៅក្នុងចានទឹកត្រជាក់ រួចដាក់ចូលថង់ ឬប្រអប់។ ដាក់ចូលទូរកកប្រសិនបើអ្នកចង់ទុករយៈពេលយូរជាងនេះ។
យើងអាចច្របាច់ដោយដៃ ឬនៅក្នុងថង់ប្លាស្ទិចក៏បានតាមចំណង់ចំណូលចិត្ត ប៉ុន្តែយើងគិតថាប្រើថង់ងាយស្រួលជាង ព្រោះវាអាចមូលល្អ៕

របៀបធ្វើវិធីធ្វើម្ទេសជ្រក់

+ គ្រឿងផ្សំ៖

- ម្ទេសដៃនាង ១គីឡូកន្លះ (ទង់ចេញកុំឱ្យល្វីង)
- ទឹកខ្មេះ ២៤០មីលីលីត្រ
- ខ្ទឹមស ១ចានចង្កឹះ
- ទឹកត្រី កន្លះចានចង្កឹះ
- ស្ករស ២ស្លាបព្រាបាយ
- អំបិល ១ស្លាបព្រាកាហ្វេ
- ទឹក ៦០០មីលីលីត្រ

+ វិធីធ្វើ៖
១. មុនដំបូងដាក់ដាំទឹកឱ្យពុះចាក់ម្ទេសចូលទុកប្រហែល ២នាទី។
២. បន្ទាប់ពី ២នាទីមកលើវាចេញចាក់ដាក់ក្នុងកញ្ជ្រែងទុកឱ្យត្រជាក់ ហើយស្ងួត។
៣. យកឆ្នាំងមួយដាក់ទឹក, ទឹកខ្មេះ, ទឹកត្រី, ស្ករស និងអំបិលចូល រួចយកវាដាក់ដាំឱ្យពុះទុកឱ្យរលាយប្រហែលជា ៥នាទីលើកចេញទុកឱ្យត្រជាក់។
៤. យកម៉ាស៊ីនកិនដាក់ម្ទេស ជាមួយទឹកដាំទុក (ទុកឱ្យត្រជាក់) និងខ្ទឹមសចូលរួចកិនឱ្យម៉ត់ប្រហែលជា ៦វិនាទី ឬតាមដែលចង់បានម៉ត់ល្មម ឬម៉ត់ខ្លាំង។
៥. បន្ទាប់ពីកិនរួចរាល់ហើយយកក្រឡរថ្មមកដាក់ច្រកម្ទេសចូល (កុំយកក្រឡរជ័រនៅពេលទុកយូរអាចធំខ្លិនជ័រ) ទុកវាឱ្យត្រជាក់ចាំគ្របគំរប ពេលដែលនៅក្តៅគ្របទៅអាចដុះផ្សិតខូចបាន៕

របៀបធ្វើបាយដំណើបខ្នុរ

គ្រឿងផ្សំ៖

- អង្ករដំណើប ២០០ ក្រាម
- ខ្ទិះដូង ១០០ មីលីលីត្រ
- ស្លឹកតយ ៣ដើម កិនយកតែទឹក
- ដូងសរសៃ
- អំបិល
- សាច់ខ្នុរ

វិធីធ្វើ៖
១. អង្ករដំណើបលាយឱ្យស្អាត ចែកជា ៣ ផ្នែក ១ ផ្នែកត្រាំជាមួយទឹកស្លឹកតយ ១ផ្នែកទៀតត្រាំជាមួយទឹកថែមពណ៌ផ្កាឈូក ១ផ្នែកទៀតត្រាំទឹកធម្មតា ពីរបីម៉ោង ឬពេញមួយយប់ បន្ទាប់មកលាយអង្ករដំណើបជាមួយទឹកស្អាតជាច្រើនដង។
២. លាយអង្ករដំណើបជាមួយអំបិលបន្តិច លាយទាំង ៣ផ្នែក រួចដាក់ចំហុយ១០ នាទី។ បន្ទាប់ពី ១០ នាទីហើយ ចាក់ខ្ទិះដូង ១/៣ ចូលរួចច្របល់ឱ្យសព្វ ចំហុយ ៧ នាទីទៀត។
៣. បន្ទាប់មកពី ៧ នាទីចាក់ខ្ទិះដែលនៅសល់ចាក់ចូលទាំង ៣ផ្នែកច្របល់ឱ្យសព្វ ចំហុយ ៧-១០ នាទីទៀតរួចបិតភ្លើង។
៤. យកបាយដំណើបដាក់ចូលសាច់ខ្នុរ រួចដាក់សរសែដូង បើចូលចិត្តខ្ទិះដូង, ល្ង, សណ្ដែកដី អាចដាក់ពីលើបាន។
វិធីធ្វើខ្ទិះដូង
យកខ្ទិះដូង ២០០មីលីលីត្រ, ស្ករស ២០ក្រាម និងអំបិលតិចដាក់ដាំ បន្ទាប់មកលាយម្សៅឆា ១/២ ស្លាបព្រាជាមួយទឹកចាក់ចូលទៅក្នុងឆ្នាំងខ្ទិះដូង ហើយកូរឱ្យសព្វរួចបិតភ្លើង៕

របៀបធ្វើមាន់ស្ពៃខ្មៅ

+ គ្រឿងផ្សំ៖

- សាច់មាន់ ៥០០ក្រាម (ស្ងោឆ្អិន)
- ស្ពៃខ្មៅ ៤០០ក្រាម (ស្រុះ)
- ប្រេងខ្យង ៣ស្លាបព្រាបាយ
- ទឹកស៊ីអ៊ីវ ២ស្លាបព្រាបាយ។
- ស្ករស ១ស្លាបព្រាបាយ
- ម្ទេសហាន់ តាមចំណូលចិត្ត
- ម្សៅស៊ុបមាន់ កន្លះស្លាបព្រាបាយ
- ខ្ទឹមបំពង កន្លះស្លាបព្រាបាយ

+ វិធីធ្វើ៖
១. ដំបូងយកសាច់មាន់ដាក់ស្ងោរឱ្យឆ្អិន រួចហាន់ជាចំណិតៗទុកមួយឡែកសិន។
២. យកចានមួយដាក់លាយគ្រឿងផ្សំមាន ទឹកស៊ីអ៊ីវ, ស្ករស និងម្ទេសហាន់ រួចកូរវាឱ្យរលាយចូលគ្នា។
៣. បន្ទាប់មកយកប្រេងខ្យង, ម្សៅស៊ុបមាន់, ខ្ទឹមបំពងចាក់ចូលកូរវាម្តងទៀតឱ្យរលាយចូលជាមួយគ្នាដែរទុកមួយឡែកសិន។
៤. ដាក់ដាំទឹកឱ្យពុះ យកស្ពៃខ្មៅស្រុះមួយសន្ទុះស្រង់ត្រាំទឹកត្រជាក់ដើម្បីឱ្យស្រួយ។
៥. យកសាច់មាន់ហាន់រួចមកលាយជាមួយគ្រឿងផ្សំដែលលាយទុកក្នុងចានឱ្យបានសព្វចូលជាតិល្អ។
៦. យកចានរាបស្មើមករៀបស្ពៃ រួចយកសាច់មាន់លាយគ្រឿងសព្វហើយដាក់រៀបពីលើគ្របឱ្យជិតដាក់ចូលទូឱ្យត្រជាក់ជាការស្រេច៕

របៀបធ្វើការ៉េមចេករស់ជាតិស្លឹកតយ

គ្រឿងផ្សំ៖

- ទឹកដោះគោជូរ ៣០០ មីលីលីត្រ (ប្រមាណ ៣ ប្រអប់)
- ដូងកំប៉ុងទិញនៅផ្សារ ឬផ្សារទំនើប ១៥០ មីលីលីត្រ
- ទឹកដោះគោខាប់ ១៥០ មីលីលីត្រ
- ស្លឹកតយ ៥ស្លឹក
- សណ្តែកដីលីងតាមចិត្តចង់
- ដូងសរសៃ
- ចេក ៤ ផ្លែ

វិធីធ្វើ៖

- ចេក១កាត់ជា ៣ ឬ៤
- យកស្លឹកតយទៅកិន ហើយយកតែទឹក។
- លាយទឹកដោះគោជូរ, ទឹកដោះគោខាប់ និង ខ្ទិះដូង ទឹកស្លឹកតយ ក្នុងចានធំមួយ។
- ដាក់ខ្ទិះដែលលាយហើយចូលក្នុងប្រអប់ការ៉េម បន្ទាប់មកដាក់ចេក១ស្រទាប់ ហើយសណ្តែកដី សរសៃដូង ធ្វើរបៀបនេះរហូតដល់អស់។ ទុកសណ្តែកដីសរសៃដូង និងខ្ទិះដូងខ្លះសម្រាប់ដាក់លើ ដាក់ខ្ទិះដូងខាងលើច្រើនកុំឱ្យធ្លាក់សណ្ដែកដី និងសរសៃដូងខណៈពេលដែលយើងបរិភោគ។
- យកទៅដាក់ទូរទឹកកកឱ្យបាន ៤ម៉ោង (អាស្រ័យលើទូរទឹកកក ខ្លះ ២ ម៉ោងកករឹងហើយ។

សូមរីករាយជាមួយនឹងការ៉េមចេកដែលអ្នកធ្វើដោយខ្លួនឯង សំរាប់ក្រុមគ្រួសាររបស់អ្នក

របៀបធ្វើនំបាក់ប៊ិន រឺនំដំឡូងដុត

+ គ្រឿងផ្សំ៖

- ដំឡូងមីស្រស់ឈូស កន្លះចានគោម
- ដំឡូងមីឈូសកញ្ចប់ ២កញ្ចប់ (ម៉ត់)
- ស្ករស ២ស្លាបព្រាបាយ
- អំបិល ចុងស្លាបព្រាកាហ្វេ
- សាច់ដូងខ្ចីហាន់ស្តើងតូចៗ
- ទឹកដោះគោខាប់ ១កំប៉ុង
- ស៊ុត ៣គ្រាប់
- ខ្ទិះដូង ១ចានគោម

+ វិធីធ្វើ៖
១. មុនដំបូងត្រូវបើកចង្ក្រានដុតនំដាក់កំដៅឱ្យក្តៅ ប្រហែលជាកន្លះម៉ោងជាមុនសិន។
២. យកដំឡូងកញ្ចប់, ដំឡូងស្រស់ឈូស, ខ្ទិះដូង, ទឹកដោះគោ, សាច់ដូងខ្ចី, ស្ករស, អំបិល និងស៊ុត(គោះដាក់) លាយបញ្ចូលគ្នាឱ្យបានសព្វល្អ។
៣. បន្ទាប់ពីលាយបានសព្វល្អហើយ យកវាចាក់ចូលក្នុងចានដែករាងជ្រុងវែង បន្ទាប់មកយកទៅដាក់ក្នុងចង្ក្រានដុតនំទុកប្រហែលជា ១ទៅ ១ម៉ោងកន្លះ។
៤. យកនំចេញពីចង្ក្រានទុកឱ្យត្រជាក់ប្រហែលជា ១៥-២០នាទីកាត់វាជារាងជ្រុងៗ ឬតាមដែលអ្នកចូលចិត្តជាការស្រេច៕

របៀបធ្វើខសរសៃសាច់គោ

គ្រឿងទេស៖

- ខ្ទឹមក្រហម ខ្ទឹមស ខ្ទឹមបារាំង ស្លឹកក្រូច ម្ទេសក្រហម រមាត ផ្កាច័ន្ទ ម្រេច
- សាច់គោ ១គីឡូ
- សរសៃគោ ១គីឡូ
- ស្ករត្នោត បីស្លាបព្រា
- ទឹកត្រី បីវែក
- អំបិល កន្លះស្លាបព្រាកាហ្វេ
- ម្រេចបុក ១ស្លាបព្រាបាយ
- ស្រាស ៤វែក
- ការុត៤ និង ដំឡូងបារាំង៤

របៀបធ្វើ៖
១. លីងខ្ទឹមបារាំង ខ្ទឹមក្រហមឱ្យឈ្ងុយ ទើបដាក់ខ្ទឹមសលីងឱ្យឈ្ងុយ ហើយដួសចេញ។
២. លីងម្ទេសក្រហម រមាត ផ្កាច័ន្ទ និង ម្រេច ឱ្យឈ្ងុយ ដួសចេញ យកទៅបុកឱ្យម៉ត់ ទើបចាក់ខ្ទឹមលីងចូល បុកឱ្យសព្វចូលសាច់គ្នាឱ្យបានមួយចានចង្កឹះ។
៣. យកសរសៃគោលាងឱ្យស្អាត ហាន់ដុំៗតូច ប្រឡាក់ស្រាស២វែក ទុកចោល ១ម៉ោង ទើបយកទៅស្ងោរឱ្យផុយ រួចស្រង់ចេញលាងទឹកឱ្យស្អាត។
៤. ហាន់សាច់គោដុំៗ រួចដាក់លាយសរសៃគោស្ងោរ យកទៅប្រលាក់នឹងគ្រឿងបុកខាងលើ លាយស្រាស២វែក និងម្រេចបុក កញ្ជ្រាវឱ្យសព្វ ទុកមួយអន្លើ ចំនួន ១ម៉ោង។
៥. កាត់ការុត និង ដំឡូងបារាំងដុំៗ ។
៦. កម្លោចស្ករត្នោតក្នុងឆ្នាំងមួយឱ្យក្រហម រួចចាក់ទឹកត្រីចូល កូរឱ្យសព្វទើបចាក់សាច់គោចូល កូររំងាស់ ទាល់តែស្ងួតទឹក ទើបចាក់បន្លែចូល ថែមទឹកស្ងោររំងាស់ ទាល់តែផុយសាច់។
៧. ភ្លក្សថែមថយ តាមចំណូលចិត្ត។ បើចង់ឱ្យកាន់តែឈ្ងុយ ថែមសន្លឹកក្រូចសើចទៅក្នុងទឹកខ ហើយរំងាស់ជាមួយសាច់។
៨. បើទទួលទានជាមួយនំប៉័ង សូមរំងាស់ឱ្យខាប់ បើទទួលទានជាមួយគុយទាវ សូមថែមទឹកឱ្យរាវ ហើយថែមថយគ្រឿងតាមចំណូលចិត្ត។
៩. ពេលដួសដាក់ចាន សូមឱ្យស្លឹកខ្ទឹម និងស្លឹកក្រូចសើចហាន់ជាសរសៃឆ្មារបំផុត៕

របៀបធ្វើលតឆា

+ គ្រឿងផ្សំ៖

- សាច់គោ ២០០ក្រាម ហាន់បន្ទះស្តើងៗ
- ស៊ុត ១គ្រាប់ ចៀនឆ្អិន
- លត ១ចានគោមតូចល្មម
- ខាត់ណា ២ដើម ហាន់បន្ទះស្តើងៗ
- ផ្កាគូឆាយ ២៥ក្រាមកាត់ ២ថ្នាំងដៃ
- សណ្តែកបណ្តុះ ២៥ក្រាម
- ទឹកស៊ីអ៊ីវខាប់ ១ស្លាបព្រាបាយ
- ស្ករស កន្លះស្លាបព្រាកាហ្វេ
- ខ្ទឹមសចិញ្ច្រាំ ១ស្លាបព្រាបាយ
- ប្រេងឆា ២-៤ស្លាបព្រាបាយ

+ វិធីធ្វើ៖
១. ដំបូងដាក់ប្រេងឆាចូលក្នុងខ្ទះដាក់ភ្លើងឱ្យក្តៅ ដាក់ខ្ទឹមសចូលឆាឱ្យឈ្ងុយដាក់សាច់គោចូលឆាត្រឡប់បន្តិចដាក់ទឹកស៊ីអ៊ីវខាប់ និងស្ករសឆាឱ្យរាងឆ្អិនល្មម។
២. បន្ទាប់មកដាក់លតចូលឆាវាជាមួយសាច់គោបន្តិចសិន រួចហើយចាំដាក់ ខាត់ណា, ផ្កាគូឆាយ និងសណ្តែកបណ្តុះ ឆាឱ្យបន្លែឆ្អិនតាមការចូលចិត្តរួចដួសដាក់ក្នុងចាន។
៣. បន្ទាប់មកទៀតយកស៊ុតមកដាក់ចៀនឱ្យឆ្អិន រួចហើយដួសដាក់ពីលើចានលតឆាជាការស្រេច៕

របៀបធ្វើការ៉េម

គ្រឿងផ្សំ៖

- សាច់ធូរេន ២៥០ក្រាម
- ខ្ទិះដូង ១៥០មីលីលីត្រ
- ទឹកដោះគោស្រស់ ២០០មីលីលីត្រ គ្មានជាតិស្ករ
- ស្ករ ៨០ក្រាម
- អំបិល
- ម្សៅ Vannila ១ស្លាបព្រាកាហ្វេ

ការអនុវត្ត៖
ជំហានទី ១៖ ខ្ទិះដូង និងស្ករស ដាក់លើចង្ក្រានដើម្បីរំលាយឱ្យចូលគ្នា ហើយបានបិទភ្លើងចង្ក្រានវិញ (កម្តៅឱ្យក្តៅបានហើយមិនបាច់ពុះទេ)។
ជំហានទី ២៖ ប្រើស្លាបព្រាច្របល់ធូរេន និងទឹកដោះគោឱ្យចូលគ្នា ហើយដាក់ម្សៅ vanilla និងអំបិលចូលរួចច្របល់ឱ្យចូលគ្នាទៀត។
ជំហានទី ៣៖ យកល្បាយដែលកូរហើយដាក់ចូលទៅប្រអប់ការ៉េម ទុកក្នុងទូរទឹកកក ៧-៨ ម៉ោងគឺអាចបរិភោគបានហើយ។
ចំណាំ៖ ប្រសិនបើអ្នកប្រើប្រអប់ធំ អ្នកត្រូវយកចេញកហើយប្រើស្លាបព្រាច្របល់វារៀងរាល់ ២ម៉ោងម្តង វានិងធ្វើឱ្យការ៉េមរបស់អ្នកម៉ត និង ទន់ល្អ៕